Сумеснае пасяджэнне прэзідыума раённага Савета дэпутатаў і раённага выканаўчага камітэта прайшло ў Магілёўскім райвыканкаме па пытанні вылучэння кандыдата ў члены Савета Рэспублікі Нацыянальнага сходу Рэспублікі Беларусь восьмага склікання.

Удзел у пасяджэнні прыняў намеснік старшыні Магілёўскага аблвыканкама Валерый Малашка. Старшыня Магілёўскага райвыканкама Алег Чыкіда ўнёс прапанову вылучыць у члены Савета Рэспублікі кандыдатуру Аляксандра Лук'янава, першага сакратара Цэнтральнага камітэта грамадскага аб'яднання «Беларускі рэспубліканскі саюз моладзі». Ён ураджэнец г. Магілёва, скончыў Камандна-інжынерны інстытут МНС, магістратуру гэтага ж інстытута, ад'юнктуру Універсітэта грамадзянскай абароны МНС, выкладаў, абараніў дысертацыю, з'яўляецца кандыдатам тэхнічных навук, дацэнтам. З 2018 па 2020 год Аляксандр Лук'янаў з'яўляўся старшынёй Маладзёжнай палаты пры Парламенцкім сходзе Саюза Беларусі і Расіі; працаваў начальнікам аддзела даследаванняў у галіне ліквідацыі надзвычайных сітуацый цэнтра навукова-даследчай работы Навукова-даследчага інстытута пажарнай бяспекі і праблем надзвычайных сітуацый МНС Рэспублікі Беларусь. У 2021 годзе быў абраны першым сакратаром ЦК БРСМ.

Намеснік старшыні аблвыканкама Валерый Малашка адзначыў, што Аляксандр Лук'янаў з'яўляецца сфарміраваным маладзёжным лідэрам, пад яго кіраўніцтвам рэалізаваны шэраг значных маладзёжных ініцыятыў. Таксама ў Аляксандра Сяргеевіча ёсць досвед навуковай і кіраўніцкай дзейнасці.

У падтрымку кандыдатуры Аляксандра Лук'янава выступілі першы намеснік старшыні райвыканкама Ірына Чында і старшыня Палыкавіцкага сельвыканкама Таццяна Русакова, якія адзначылі яго прыхільнасць да курсу краіны, глыбокую адданасць Радзіме і актыўную грамадзянскую пазіцыю.

Аляксандр Лук'янаў падкрэсліў, што ён нарадзіўся і вырас на Магілёўшчыне, добра ведае рэгіён, прыкладзе ўсе намаганні для вырашэння канкрэтных задач горада, раёна, вобласці і краіны, абавязаўся працаваць з поўнай аддачай на карысць простага чалавека працы і на тое, каб Прыдняпроўскі край квітнеў.

Члены прэзідыума райсавета дэпутатаў і райвыканкама аднагалосна прагаласавалі за вылучэнне кандыдата ў члены Савета Рэспублікі Нацыянальнага сходу Рэспублікі Беларусь восьмага склікання першага сакратара Цэнтральнага камітэта грамадскага аб'яднання «Беларускі рэспубліканскі саюз моладзі» Аляксандра Лук'янава. Вылучэнне з 21 сакавіка ўключна.