У новы навучальны год паклікаў сёння школьны званок 510 навучэнцаў ДУА «Буйніцкая сярэдняя школа Магілёўскага раёна». Для 64 з іх ён стаў самым першым у іх жыцці. Павіншаваць дзяцей з Днём ведаў прыехаў старшыня Магілёўскага аблвыканкама Анатоль Ісачанка.

«Першае верасня – гэта заўсёды хвалююча, – сказаў Анатоль Міхайлавіч, – бо ў гэты дзень за школьныя парты садзяцца нашы дзеці. У Магілёўскай вобласці 1 верасня ў школу прыйдзе 115 тысяч навучэнцаў, з іх 12 тысяч – першакласнікі. І, вядома, для іх – гэта асаблівы і хвалюючы дзень.

Не менш хвалююцца і іх бацькі. Хвалююцца і перажываюць за тое, што чакае іх дзяцей у школе, якой будзе іх першая настаўніца, як складуцца іх адносіны. Бо ад таго, як складуцца адносіны паміж настаўнікам і бацькамі, залежыць многае ў выхаванні дзіцяці. І дай Бог, каб усё атрымалася.

Па-свойму гэты дзень хвалюючы для тых, хто ў гэтым годзе будзе заканчваць школу. Наперадзе дарослае жыццё, уступныя экзамены. І трэба вызначыцца, куды паступаць, якую выбраць прафесію, якія прадметы здаваць, а якія пытанні – падцягнуць».

Анатоль Міхайлавіч пажадаў усім удзельнікам навучальнага працэсу цярпення, павагі, добразычлівасці, добрых узаемаадносін і ўручыў дырэктару школы Людміле Клімасёвай дакументы на каляровы прынтар.

Па заведзенай традыцыі кожны першакласнік у гэты дзень атрымаў кнігу – падарунак ад Прэзідэнта Рэспублікі Беларусь Аляксандра Лукашэнкі «Беларусь – наша Радзіма». Навучэнцам аднаго з першых класаў ДУА «Буйніцкая сярэдняя школа Магілёўскага раёна» яе ўручыў сам Анатоль Ісачанка, пабываўшы на першым іх у жыцці ўроку.

mogilevnews.by