8 ліпеня ў Магілёўскім раёне на ўборачнай-2024 быў пастаўлены першы рэкорд. Сяргей Май і Рыгор Бокач, механізатары ЗАТ "Сервалюкс Агра", выйшлі на паказчыкі ў тысячу тон намалоту збожжа новага ўраджаю. Лідэры жніва першымі пераадолелі майстэрскую планку не толькі ў Магілёўскім раёне, але і ў вобласці. І сталі трэцімі ў краіне! 

Павіншаваць аграрыяў на полі, дзе быў дасягнуты вынік, прыехалі прадстаўнікі выканаўчай улады раёна і вобласці, кіруючага складу прадпрыемства, райсельгасхарча, лідэры прафсаюзнага руху. У іх ліку - губернатар Магілёўскай вобласці Анатоль Ісачэнка і старшыня Магілёўскага райвыканкама Алег Чыкіда. 

- Прыемна, што ў вобласці ёсць першыя тысячнікі. Упэўнены, што хутка будуць і двух-, і трохтысячнікі. Віды на ўраджай у нас добрыя. Галоўная задача - прыбраць хутка, аператыўна, каб тэхніка не падвяла, - адзначыў Анатоль Ісачэнка. 

- Магілёўскі раён практычна гатовы да ўборкі ўраджаю 2024 года. Ужо зараз поўным ходам ідуць уборачныя работы ва ўсіх сельгасарганізацыях. На сённяшні дзень азімага ячменю ўбрана 74 працэнты. Ураджайнасць - плюс 20 працэнтаў да мінулага года. А сяўба азімага ячменю сёлета павялічана ў два разы, - паведаміў Алег Чыкіда.

Па традыцыі ўшаноўвання лепшых працаўнікоў палёў, механізатарам былі ўручаны граматы, падарункі, грашовыя прэміі і лідэрская сімволіка, а таксама быў адзначаны іх вялікі ўклад у будучы ўраджай і сказаны словы наказаў на новыя рэкорды.

І мяркуючы па тэмпах, з якімі працуюць і іншыя аграрыі, колькасць тысячнікаў у хуткім часе папоўніцца новымі імёнамі.

Падчас ушаноўвання перадавікоў не толькі абмяркоўваліся перспектывы будучага ўраджаю, але і былі праінспектаваны палі ЗАТ "Сервалюкс Агра", дзе вырошчваюцца кукуруза і пшаніца. Мяркуючы па ацэнках спецыялістаў, у прадпрыемства ёсць усе шанцы атрымаць добры ўраджай гэтых культур.