У ААТ "Эксперыментальная база "Дашкаўка" Магілёўскага раёна зрабілі стаўку на маладых спецыялістаў і атрымалі дастойны вынік.

Галоўны аграном ААТ "Эксперыментальная база "Дашкаўка" Магілёўскага раёна Міхаіл Мікуліч з гонарам расказвае, што сёлета ў два разы прыраслі па намалоце:

— Плошчы былі нават некалькі меншымі, чым год таму. Палова былі азімыя, яны даюць вышэйшую ўраджайнасць, таму на 2025-ы адводзім пад іх ужо 80 працэнтаў палёў — да 800 гектараў. Асабліва парадавалі азiмае жыта і яравы авёс. Жыта дало каля 30 цэнтнераў з гектара. У нас у асноўным пяшчаныя землі, вільгаць у іх затрымліваецца дрэнна, усе мінеральныя ўгнаенні і пажыўныя рэчывы хутка прамываюцца ў глебу. Але ў гаспадарцы летась за кошт сродкаў рэспубліканскага бюджэту абнавіўся машынна-трактарны парк: атрымалі два трактары, у тым ліку энерганасычаны, новы плуг і культыватар. А гэта больш якасная апрацоўка глебы і канчатковы вынік.

На ўборачнай у "Дашкаўцы" працавалі чатыры камбайны, камандзірам аднаго з экіпажаў быў галоўны аграном. Двух чалавек прыцягнулі ў дапамогу з іншых арганізацый: механізатары патрэбны. Але кадравае пытанне тут пачалі вырашаць на перспектыву: пераканалі прыехаць з іншай вобласці двух маладых механізатараў - Рамана Ляховіча і Захара Дамброўскага, за кошт гаспадаркі ім знялі кватэру. Дарэчы, у "Дашкаўцы" робяць стаўку на моладзь. Дырэктару і галоўнаму аграному па 27 гадоў, абодва пайшлі па слядах бацькоў. Сяргей Сыса ў ролі кіраўніка сельгаспрадпрыемства першы год. У Міхася Мікуліча бацька працаваў у гэтым жа сельгаспрадпрыемстве галоўным аграномам. Міхаіл скончыў з адзнакай Беларускую дзяржаўную сельскагаспадарчую акадэмію, прыйшоў у "Дашкаўку" па мэтавым накіраванні, працуе шосты год. У камандзе галоўных спецыялістаў маладыя таксама інжынер, бухгалтар, юрысконсульт. Жонка Міхаіла Анастасія ў гэтай жа гаспадарцы сумяшчае адразу некалькі пасад: юрысконсульт, намеснік дырэктара па ідэалагічнай рабоце і інжынер па ахове працы.

- Нам патрэбны механізатары не проста каб запоўніць штат, а каб гэта былі кваліфікаваныя спецыялісты і добрасумленныя работнікі, - Міхаіл упэўнены, што ў кадравай стратэгіі неабходны якасны падыход. — Мы ездзілі і ў БДСГА, і ў наш Магілёўскі агралесатэхнічны каледж, але не знайшлі пакуль свае кадры. У сельгасакадэміі шмат таленавітых выкладчыкаў, таму ўсё залежыць ад студэнта, з якім багажом ведаў ён прыедзе на першае працоўнае месца. Хоць я і вучыўся на агранома, але з дэканам мехфака Уладзімірам Уладзіміравічам Гусаравым мы да гэтага часу на сувязі, ён з вялікім жаданнем дапамагае, кансультуе. Дзякуючы яму наладзіў новы камбайн, маючы зносіны па тэлефоне.

Дарэчы, у лідэры на жніве выйшаў экіпаж галоўнага агранома з вынікам 900 тон. Міхаіл жартуе, што з кабіны камбайна яшчэ лепш бачна, як працуюць астатнія і ці няма страт у палях. Памочнікам у агранома - вопытны механізатар Васіль Лысянкоў.

— Калі я прыйшоў у гаспадарку, то ў першы год я быў у яго памочнікам на камбайне, — расказвае Міхаіл. - Ён у нас перадавік, далі яму новы энерганасычаны трактар. Такіх бы Васіліеў Уладзіміравічаў нам яшчэ чалавека два — кадравае пытанне закрылася б. А зараз мы памяняліся ролямі. Механізатары задаволены заробкам: і ўраджай вырас, і расцэнкі мы паднялі для матывацыі. А калі прадукцыя раслінаводства пройдзе праз малако, то атрымаем прыбытак.

У "Дашкаўцы" яшчэ трэба будзе сабраць 450 гектараў кукурузы на сілас, каб мець паўтарагадовы запас кармоў.

— Будзем павялічваць пасевы шматгадовай травы і зменшым пасевы кукурузы на сілас, — галоўны аграном расказвае аб змяненні структуры пасяўных плошчаў. — Гэта трэба для таго, каб збалансаваць бялок і абалоніну ў кармах. У гэтым сезоне за два ўкосы перавыканалі план. Апошнія два тыдні надвор'е не спрыяе, паспяванне кукурузы пайшло з апярэджаннем тэрмінаў, у зямлі на глыбіні ворнага пласта мінімальны працэнт вільгаці — кукуруза ўжо на пні стаіць сухая. На ўраджайнасць не паўплывала, але ссунуліся тэрміны ўборкі амаль на месяц, а гэта дадатковая нагрузка на тэхніку і механізатараў. Яшчэ ў нас 20 гектараў бульбы, ураджайнасць добрая — да 300 цэнтнераў з гектара. Ёсць дзе захоўваць, таму прадаваць будзем у міжсезонне па высокіх цэнах.

У маладога агранома гэта ўжо шостая ўборачная. Міхаіл Мікуліч ганарыцца, што па ўраджайнасці — самая паспяховая:

— Цяпер пачынаецца самы галоўны этап — сяўба азімых, закладка будучага ўраджаю. Неабходна ўкласціся ў агратэхнічныя тэрміны: спазненне хаця б на дзень — страта працэнта ўсходжасці і ўраджайнасці. Насенне маецца, у тым ліку эліта, угнаенні ўнесены пад поўную патрэбнасць. Трэба будзе — сяду на трактар, але пакуль вымалёўваецца, што па тэхніцы і механізатарам пытанняў не будзе. Разводжу сам абеды ў палі. Такім чынам эканомім рэсурсы і вельмі зручна сачыць за працай на розных участках. Завяршаецца ўзворванне глебы пад азімую сяўбу: з запланаваных 800 гектараў ужо зааралі 700. Некалькі дзён таму пачалі ўборку на сілас кукурузы, нарыхтавалі ўжо 1600 тон. Паралельна вядуцца работы па прэсаванні саломы і ўборкі яе з палёў, уносяцца мінеральныя ўгнаенні пад азімую сяўбу, у бліжэйшыя дні прыступім да ўборкі бульбы. Мая мара — атрымаць яшчэ больш высокі ўраджай па ўсіх відах культур, а галоўнае, каб узнімалася матэрыяльна-фінансавае становішча нашага сельгаспрадпрыемства.

КАМПЕТЭНТНЫ КАМЕНТАР

Алег ЧЫКІДА, старшыня Магілёўскага райвыканкама:

— Магілёўскі раён перасягнуў мяжу 100 тысяч тон збожжа па намалоце. Вынік уборкі збожжавых ва ўлічаным сектары без уліку рапсу — 101,5 тысячы тон, рост склаў 114 працэнтаў. Практычна ўсе гаспадаркі спрацавалі з плюсам. Ва ўборачнай былі заняты 95 экіпажаў, 45 з іх намалацілі тысячу тон і больш. Чацвёрка лідэраў выглядае так: тры механізатары з ЗАТ "Сервалюкс Агра" — Сяргей Май з вынікам, які перасягнуў 6 тысяч тон збожжа, Рыгор Бокач — звыш 5 тысяч, Сяргей Васількоў набліжаецца да 5 тысяч. Аляксандр Какулькін з ЗАТ "Агракамбінат "Зара" пераадолеў вынік 4 тысячы тон. 95 вадзіцеляў працавалі на адвозцы збожжа, 18 чалавек перавезлі тысячу тон і больш. Сярод рэкардсменаў - Андрэй Максутаў з ЗАТ "Агракамбінат "Зара", які перавёз больш за 5 тысяч тон збожжа. Брыгада аператараў зернесушыльнага комплексу той жа гаспадаркі перапрацавала больш за 25 тысяч тон збожжа.

Каманда аграрыяў спрацавала зладжана, атрыманы высокі вынік, але пры закладцы новага ўраджаю будуць улічаны ўсе тэхналагічныя недапрацоўкі ў вытворчасці збожжа для росту ўраджаю. Кіраўніком дзяржавы і старшынёй Магілёўскага аблвыканкама ставіцца задача дабівацца не толькі аб'ёмных паказчыкаў, але і эканамічных. Вытворчасць павінна быць не дзеля вытворчасці, а накіравана на атрыманне прыбытку. У Магілёўскім раёне за сем месяцаў атрымана валавой прадукцыі на 330 мільёнаў 144 тысячы рублёў — 114,3 працэнта да ўзроўню мінулага года. Усе сельгасарганізацыі спрацавалі з плюсам. Выручка ад рэалізаванай сельгаспрадуцыі склала 500 мільёнаў 767 тысяч рублёў, рост склаў 124 працэнты. Выручка на аднаго працуючага — 104 тысячы 578 рублёў з ростам 127 працэнтаў. Сярэдняя заработная плата ў вёсцы вырасла на 130 працэнтаў і склала 2 тысячы 17 рублёў. Чысты прыбытак вырас у два разы і склаў 73 мільёны 328 тысяч рублёў. Рэнтабельнасць продажаў — 12,9 працэнта, плюс 4,4 працэнта да 2023-га. Рэнтабельнасць па канчатковым выніку склала 18,7 працэнта, плюс 8 працэнтных пунктаў.

Нам ёсць над чым працаваць. Галоўныя рэсурсы — тэхналагічная і выканаўчая дысцыпліна, як вынік, зніжэнне сабекошту і рост рэнтабельнасці. Велізарная падзяка тым, хто працуе ў палях ад світання да заходу. Падчас жніва проста ў полі мы павіншавалі 80 чалавек. Яны атрымалі каштоўныя падарункі і граматы. Фініш жніва не стаў заканчэннем сельгасработ. Ужо зараз ідзе закладка новага ўраджаю. Па тэхналогіі адсеялі азімы рапс, корманарыхтоўка працягваецца. Ужо нарыхтавалі 15 кармавых адзінак на ўмоўную галаву жывёлы — гэта плюс 3,6 адзінкі. Актыўна ідзе ўборка кукурузы на сілас, таксама пачалі ўборку бульбы, агародніны, цукровых буракоў.

Прэзідэнт надае пільную ўвагу аграрнай галіне, якая ўносіць вялікі ўклад у эканоміку краіны. Дзякуючы дзяржаўнай падтрымцы, увазе аблвыканкама і кіраўніка рэгіёну да развіцця сельскай гаспадаркі нашы аграпрадпрыемствы абнаўляюць тэхніку, набываюць насенне, угнаенні і паліва. А ўжо наша задача — атрымаць максімальны эфект і забяспечыць харчовую бяспеку.