У Магілёўскай вобласці дадзены афіцыйны старт рэспубліканскай добраахвотнай акцыі «Адновім лясы разам!», якая будзе працягвацца з 8 па 22 кастрычніка.

Першымі да высадкі лесу прыступілі работнікі цэнтральнага апарату Міністэрства лясной гаспадаркі і УП «Белдзяржпаляванне» – усяго каля 60 чалавек. Яны працавалі ў Вільчыцкім доследна-вытворчым лясніцтве. За некалькі гадзін на тэрыторыі ў 2,8 га агульнымі сіламі высаджана каля 11 тыс. саджанцаў хвоі і бярозы. З часам і пры належным доглядзе на гэтым месцы вырасце прыгожы малады лес, а да 80–100 гадоў ужо стане паўнавартасным дрэвастоем. Удзел у аднаўленні ляснога фонду прыняў першы намеснік міністра лясной гаспадаркі Аляксандр Драгун разам з жонкай Анастасіяй.

«Магілёўская вобласць аказалася найбольш пацярпелай з усіх у выніку трох ураганаў, – расказаў Аляксандр Драгун. – Калі пасля разгулу стыхіі па краіне было 10 тыс. га суцэльных санітарных высечак, то 7,5 тыс. прыйшлося менавіта на гэты рэгіён. Раней мы з такім ніколі не сутыкаліся. Прычым тут былі і зімовыя бураломы, што здараецца вельмі рэдка. Таму для старту нашай акцыі абрана гэта вобласць. Адразу пасля буралому на гэтых тэрыторыях быў сапраўды месяцавы пейзаж. Цяпер мы бачым, якая велізарная праца была зроблена нашымі работнікамі, каб ліквідаваць наступствы ўраганных вятроў у самыя кароткія тэрміны. Таму на Магілёўшчыне толькі гэтай восенню на пашкоджаных участках плануецца высадзіць 635 га новых лясоў, калі ў цэлым па краіне штогод мы ствараем каля 40 тыс. га».

Аляксандр Драгун таксама падкрэсліў, што для аднаўлення прыроднага багацця краіны апарат Мінлясгаса ўпершыню выехаў у такім складзе ў Магілёўскую вобласць. І такая добрая традыцыя павінна працягнуцца, а таксама стаць прыкладам для іншых дзяржаўных службаў, арганізацый і ведамстваў. Гэта важнае пачынанне, якое дазваляе пазнаёміцца не толькі з прыродным багаццем магілёўскага краю, але таксама з гісторыяй гэтых месцаў. Менавіта таму акцыя прысвечана Году гістарычнай памяці. У сваю чаргу жонка намесніка міністра Анастасія падкрэсліла, што такія ініцыятывы маюць вялікае значэнне з пункту гледжання згуртавання людзей: «Мне было вельмі прыемна паўдзельнічаць у гэтай акцыі. Яна аб’ядноўвае ўсіх людзей, у тым ліку сем’і. Мы садзім сёння бярозу і спадзяёмся, што ўжо зусім хутка ўбачым плён нашай працы».

У ліку тых, хто актыўна падключыўся ў аднаўленне лесу, – калектыў УП «Белдзяржпаляванне» на чале з дырэктарам прадпрыемства Вадзімам Круцько. «Працуем з добрым настроем – карысная акцыя, надвор’е радуе, – кажа кіраўнік. – Мы штогод удзельнічаем у такіх ініцыятывах усім калектывам, сёлета да нас далучыліся нават дзве мамы-дэкрэтніцы. Усе хацелі сюды прыехаць, таму што абнаўленне лясоў – гэта важнае пачынанне: трэба пасадзіць дрэвы зноўку, каб нашы дзеці, нашчадкі карысталіся прыроднымі дарамі».

У ліку тых, хто ўпершыню прымае ўдзел у акцыі, – вядучы эканаміст упраўлення эканомікі і інвестыцый Міністэрства лясной гаспадаркі Марыя Зіновік. Дзяўчына працуе ў ведамстве каля года, і для яе гэта акцыя стала своеасаблівым баявым хрышчэннем – раней лес яна не саджала. «Лясная гаспадарка – вельмі важная галіна, бо гэта лёгкія нашай краіны. Важна аднаўляць насаджэнні, і такія акцыі адыгрываюць у гэтым вялікую ролю. Выдатна, што мы можам усёй рэспублікай сабрацца і дапамагчы нашай прыродзе. Лічу, што кожны ў сваім жыцці павінен пасадзіць як мінімум адно дрэва. Для мяне высадка лесу – зусім новы вопыт, і я вельмі гэтым натхнёная. Адчуваю дачыненне да вялікай справы, бо гэта не толькі сумесная праца, але і вялікі ўклад у будучыню – мірнае, добрае і стваральнае», – адзначыла Марыя Зіновік.

Дарэчы, толькі ў першы дзень акцыі па аднаўленні лесу ў Магілёўскім раёне высаджана каля 50 тыс. дрэўцаў, па ўсёй вобласці – амаль 260 тыс. Аднавіць лясы рэгіёна ў гэты дзень дапамагалі таксама прадстаўнікі іншых абласцей. Так, апарат Віцебскага ДВЛГА працаваў у Клімавіцкім лясгасе, Брэсцкага – у Чавускім, Мінскага – у Быхаўскім.

БЕЛТА