Патрыятычнае выхаванне моладзі, замацаванне маладых спецыялістаў на месцах і будаўніцтва жылля: дэпутаты Магілёўскай вобласці абмеркавалі актуальныя пытанні падчас выязной сесіі, якая прайшла 23 верасня ў Быхаве.

Як адзначыла старшыня Магілёўскага абласнога Савета дэпутатаў Ірына Раінчык, на парадак дня сённяшняй сустрэчы былі вынесены актуальныя пытанні. Іх разглядалі на прыкладах работы ўстаноў і прадпрыемстваў Быхава. Так, удзельнікі сустрэчы азнаёміліся з выставай макетаў спаленых у гады Вялікай Айчыннай вайны вёсак Быхаўскага раёна. Іх аўтарамі сталі навучэнцы ўстаноў адукацыі Быхава. Акрамя гэтага, дэпутаты Магілёўскай вобласці пазнаёміліся з ініцыятывамі жыхароў горада, якія былі паспяхова рэалізаваны ў жыццё. І, па словах Ірыны Раінчык, праца дэпутатаў павінна быць накіравана на пастаяннае ўзаемадзеянне з грамадзянамі, а рэалізацыя ініцыятыў нашага насельніцтва дапамагае ісці грамадству ў нагу з часам.

Сярод тэм, якія абмяркоўваюцца, – замацаванне маладых спецыялістаў на месцах. Як у раёне будуецца праца з новым кадравым папаўненнем, дэпутаты разгледзелі на прыкладзе ДЛГУ «Быхаўскі лясгас». І, як адзначыў дырэктар лясгаса Віктар Кузняцоў, за апошнія пяць гадоў на месцах замацавалася каля 60% кадраў. Гэта стала магчымым дзякуючы ўважлівым адносінам да маладога папаўнення. Даплаты да заработнай платы, камфортныя ўмовы працы, дапамога з жыллём, настаўніцкая традыцыя, актыўнае культурнае і спартыўнае жыццё – усё гэта дапамагае ствараць умовы, пры якіх у людзей з’яўляецца жаданне развівацца і працаваць у калектыве Быхаўскага лясгаса, а не шукаць сабе іншае месца.

Яшчэ адно важнае пытанне, якое закранулі сёння падчас сустрэчы, – патрыятычнае выхаванне моладзі. І, як адзначылі дэпутаты, у сучасных рэаліях гэта тэма выйшла на першы план. Прыкладам такой працы стаў ваенна-гістарычны музей 57-й марской ракетаноснай авіяцыйнай дывізіі, які размясціўся ў ДУА «Гімназія г. Быхава». Навучэнцы гімназіі правялі для гасцей цікавую экскурсію.

Адным з важных паказчыкаў сацыяльна-эканамічнага жыцця з’яўляецца будаўніцтва жылля. Так, дэпутаты Магілёўскага абласнога Савета дэпутатаў падчас выязной сесіі азнаёміліся з ходам будаўніцтва шматкватэрнага жылога дома ў мікрараёне Колас.

Пасля гэтага ў Быхаве прайшло пасяджэнне выязной сесіі Магілёўскага абласнога Савета дэпутатаў, дзе былі падведзены вынікі і адзначаны найбольш праблемныя пытанні, якія патрабуюць дапрацовак і больш пільнай увагі дэпутацкага корпуса.

БЕЛТА