Беларусь і Кыргызстан будуць развіваць супрацоўніцтва ў сферы чыгуначнага транспарту, паведамілі БЕЛТА ў прэс-цэнтры Беларускай чыгункі.

Так, падпісаны мемарандум паміж Беларускай чыгункай і Кыргызскай чыгункай аб развіцці супрацоўніцтва ў сферы чыгуначнага транспарту. Таксама гэта кыргызскае прадпрыемства падпісала мемарандум у галіне праектавання чыгуначных аб'ектаў з дзяржаўным прадпрыемствам "Інстытут "Белчыгпраект".

Падпісанне дакументаў адбылося ў час візіту ў Беларусь дэлегацыі Кыргызстана на чале з намеснікам старшыні Кабінета міністраў Бакытам Тарабаевым. Таксама ў час візіту дэлегацыя наведала Цэнтр кіравання перавозкамі Беларускай чыгункі. Галоўнай тэмай сустрэчы стала абмеркаванне бакамі магчымых напрамкаў кааперацыйнага супрацоўніцтва.

Першы намеснік начальніка БЧ Пётр Дулуб адзначыў, што Цэнтр кіравання перавозкамі з'яўляецца галоўным каардынатарам арганізацыі перавозачнага працэсу і эксплуатацыйнай работы ўсіх падраздзяленняў Беларускай чыгункі. Ён азнаёміў прысутных з вытворчым патэнцыялам беларускай магістралі. Бакыт Тарабаеў падкрэсліў вялікую зацікаўленасць у супрацоўніцтве з БЧ па рэалізацыі інфраструктурных праектаў у Кыргызстане і арганізацыі мультымадальных перавозак.

Брэсцкае аддзяленне Беларускай чыгункі, дзяржаўнае прадпрыемства "Інстытут "Белчыгпраект", Канструктарска-тэхнічны цэнтр БЧ, ААТ "Брэсцкі электратэхнічны завод", ААТ "Дарбудмантажтрэст", ААТ "Барысаўскі шпалапрапітны завод" прэзентавалі кыргызскім гасцям свае вытворчыя і тэхналагічныя магчымасці.

Акрамя таго, дэлегацыя Кыргызстана наведала Асіповіцкі завод жалезабетонных канструкцый ААТ "Дарбудмантажтрэст" і Асіповіцкі завод транспартнага машынабудавання.