Зносіны з людзьмі на месцах дапамагаюць раскрываць працу ўсіх службаў і органаў улады на той тэрыторыі, дзе пражываюць грамадзяне, якія звярнуліся. Такім меркаваннем падзяліўся памочнік Прэзідэнта – інспектар па Магілёўскай вобласці Леанід Мартынюк, падводзячы вынікі прамой тэлефоннай лініі, якая адбылася ў Чавускім раёне.

«Кожны рэгіён мае сваю спецыфіку ў зваротах. І гэты раён – адзін з найбуйнейшых сельскагаспадарчых раёнаў Магілёўскай вобласці. І людзі, незалежна ад таго, у горадзе яны жывуць або сельскай мясцовасці, хочуць, каб іх умовы жыцця былі сучаснымі і камфортнымі. А задача ўлады на ўсіх узроўнях зводзіцца да таго, каб забяспечыць людзям гэтыя ўмовы, – адзначыў Леанід Мартынюк. – Безумоўна, гэта праца кладзецца на прадпрыемствы: ЖКГ, водаканал, энэргетыкаў, газавую службу. Усе яны дзейнічаюць у межах існуючага прававога поля. І не дапускаюць яго парушэння, каб сваёй працай забяспечваць якаснае і бяспечнае пражыванне нашых грамадзян. І таму прамая лінія, якая прайшла сёння, характарызуе працу ўсіх службаў раёна».

Па словах памочніка Прэзідэнта – інспектара па Магілёўскай вобласці, большасць пытанняў, якія паступілі падчас прамой лініі тычылася якасных умоў жыцця. «Але важна ж разумець, што нашы прыгожыя вуліцы, добраўпарадкаваная і дагледжаная тэрыторыя двароў – гэта не толькі праца камунальных службаў. Гэта яшчэ і беражлівыя адносіны да чужой працы жыхароў населеных пунктаў. І гэта трэба выхоўваць у нашых дзецях. Таму што калі бацькі возьмуць сваіх дзяцей і разам пасадзяць у двары дома дрэва або пафарбуюць лавачку, адносіны будуць ужо зусім іншыя», – падкрэсліў ён.

Яшчэ адно важнае пытанне, на якое звярнуў асаблівую ўвагу Леанід Мартынюк, – захаванне працоўнай дысцыпліны і правілаў аховы працы. «Гэта павінна быць не проста прыярытэтным напрамкам у працы кожнага прадпрыемства ў цэлым у рэгіёне, гэта павінна быць асноватворнымі запаведзямі для кожнага кіраўніка любога ўзроўню. За разгільдзяйствам і безадказнасцю заўсёды стаяць чалавечыя жыцці і лёсы. І пра гэта заўсёды неабходна памятаць, – падкрэсліў ён. – Своечасовае выяўленне праблем, уменне прадбачыць сітуацыю і пралічыць свае крокі на некалькі наперад – усё гэта дазваляе граматным кіраўнікам не дапускаць абвастрэння сітуацый і зусім нівеліраваць наяўныя праблемы».

Сярод тых, хто звярнуўся падчас прамой лініі, – пажылыя жыхары Чавускага раёна. «Некаторым грамадзянам неабходная дапамога ў тлумачэнні дзеючага заканадаўства па налічэнні пенсіі. У першую чаргу гэта звязана з узростам тых, хто звярнуўся. Пажылым людзям, бывае, складана самім разабрацца і правільна ацаніць той ці іншы перагляд памеру пенсій. З такімі людзьмі праводзіцца тлумачальная праца, якая накіравана на дапамогу і кансультацыі ў даных пытаннях. І даносіць людзям інфармацыю неабходна ў зразумелай і даступнай форме», – адзначыў Леанід Мартынюк.

БЕЛТА