У гонар прафесійнага свята – Дня работнікаў пракуратуры (адзначаецца 26 чэрвеня) – і векавога юбілею з дня ўтварэння пракуратуры Беларусі ў Палацы культуры вобласці адбылося ўшанаванне пракурорскіх работнікаў Магілёўшчыны. Сярод ганаровых гасцей мерапрыемства былі старшыні Магаблвыканкама і Маггаравыканкама Анатоль Ісачанка і Уладзімір Цумараў, памочнік Прэзідэнта – інспектар па Магілёўскай вобласці Леанід Мартынюк, старшыні Магілёўскага абласнога і гарадскога Саветаў дэпутатаў Ірына Раінчык і Максім Гурын, кіраўнікі сумежных ведамстваў і сілавых структур, ветэраны органаў пракуратуры.

– 100 гадоў органы пракуратуры Рэспублікі Беларусь свята стаяць на варце вяршэнства Закона, абараняючы правы і інтарэсы грамадзян, грамадства і дзяржавы. З дня ўтварэння пракуратура разам з усёй краінай перажывала перыяды станаўлення, развіцця, несла нягоды ваеннага часу і пасляваеннай разрухі. Захаваць незалежнасць нашай дзяржавы ўдалося, у ліку іншага, дзякуючы зладжанай, самаадданай працы работнікаў пракуратуры, іх прафесійным якасцям, – адзначыў у сваім прывітальным слове пракурор Магілёўскай вобласці Аляксандр Чадзюк.

– Паважаныя супрацоўнікі і ветэраны органаў пракуратуры, прыміце шчырыя віншаванні з прафесійным святам і 100-годдзем пракуратуры Беларусі, – сказаў старшыня Магілёўскага аблвыканкама Анатоль Ісачанка. – Усе гэтыя гады вы іграеце найважнейшую ролю ва ўмацаванні беларускай дзяржаўнасці, абароне канстытуцыйных правоў і законных інтарэсаў нашых грамадзян і дзяржавы. Фарміраванне прававых асноў грамадства – гэта штодзённая карпатлівая праца многіх пакаленняў супрацоўнікаў пракуратуры. У нашай краіне, як неаднаразова падкрэсліваў кіраўнік дзяржавы, вяршэнства закона ў прыярытэце. А выразная і зладжаная праца супрацоўнікаў ведамства з’яўляецца надзейным падмуркам ва ўмацаванні законнасці і захаванні правапарадку ў краіне. Асаблівыя словы ўдзячнасці – ветэранам, якія перадаюць назапашаны вопыт маладым калегам. Здароўя, поспехаў, дабрабыту і дабра.

Пажаданне пракурорскім работнікам Магілёўскай вобласці адрасаваў і генеральны пракурор Рэспублікі Беларусь Андрэй Швед: «За 100 гадоў існавання органаў пракуратуры пракуроры пацвердзілі важнасць сваёй прафесіі вынікамі працы. Пракуратура Магілёўскай вобласці заслугоўвае высокай ацэнкі. Задачы, якія сёння перад намі стаяць, вельмі важныя, асабліва на фоне падзей у свеце. На сённяшні дзень мы разам з праваахоўным блокам паспяхова супрацьстаім выклікам сучаснасці».

Больш за 100 пракурорскіх работнікаў Магілёўшчыны адзначаны падзякамі і ўзнагародамі за добрасумленнае выкананне службовых абавязкаў, унесены асабісты ўклад у справу ўмацаванне законнасці і правапарадку.

Медалямі «За бездакорную службу» розных ступеняў узнагароджаны намеснік начальніка аддзела па наглядзе за адпаведнасцю закону судовых рашэнняў па крымінальных справах Таццяна Амосава, начальнік аддзела па барацьбе з карупцыяй і арганізаванай злачыннасцю Аляксандр Карашкоў, старшыя памочнікі пракурора г. Бабруйска Вольга Белагурава і Наталля Лосева. Званне «Ганаровы работнік пракуратуры Рэспублікі Беларусь» прысвоена старшаму памочніку пракурора Магілёўскай вобласці па наглядзе за выкананнем заканадаўства аб непаўналетніх і моладзі Святлане Кашняровай. Падзякай ад Генеральнага пракурора Рэспублікі Беларусь удастоены: намеснік начальніка аддзела па наглядзе за выкананнем заканадаўства органамі крымінальна-выканаўчай сістэмы і прымусовага выканання Ігар Салянюк і старшы пракурор аддзела па наглядзе за выкананнем заканадаўства упраўленнем СК РБ па Магілёўскай вобласці Алена Лосева.

mogilevnews.by